Quen Somos – Gandería Casa do Xordo

Quen
Somos

Gandería Casa do Xordo

A miña granxa gandeira, familiar e ecolóxica atópase asentada no xentil lugar da Cal, na parroquia do Maroxo (Concello de Arzúa). O seu nome O xordo de Maroxo foi herdado da vivenda da unidade familiar, composta dende sempre por amantes do rural aos que lles gusta valorar e que valoren o traballo, os animais, o entorno e en xeral os principios ecolóxicos.

O meu obxectivo

Producir un leite de alta calidade, sen ningún tipo de residuo químico, mediante o emprego de prácticas que respecten o entorno natural e favorezan a calidade de vida dos animais.

Todo isto ligado a un factor económico xusto que nos permita vivir dignamente do noso rural galego.

Un pouco de historia

O Xordo de Maroxo é unha granxa familiar que soubo transmitir a sabedoría e a paixón polo rural de xeración en xeración dende os seus inicios no ano 1926.

Esta longa traxectoria foi a que me levou dende ben pequeno a involucrarme nos traballos do campo, decidindo facerme titular da mesma no ano 2001 e así manter a tradición ancestral de cambio xeracional da granxa.

O cambio a ecolóxico, coa súa inscrición no CRAEGA, chegou no 2008 impulsado por unha ideoloxía baseada no respecto pola biodiversidade, polo medio ambiente e polo benestar animal. En realidade, trátase de facer o que che gusta e facelo ben.

Co paso dos anos vin necesario gañar en espazo, en comodidade e aforrar en tempo o que me levou no 2015 á construción dun establo novo para as vacas lactantes. Unha noticia que as protagonistas da granxa acolleron estupendamente.

Dende o 2018 son fornecedor de leite para Casa Grande de Xanceda. Unha granxa ecolóxica que defende uns principios idénticos aos meus e que dispón dunha fábrica para a elaboración dos seus propios produtos lácteos ecolóxicos, que destacan no mercado pola súa calidade.

A conversión a ecolóxico

Seguir os pasos de granxas ecolóxicas referentes foi todo un apoio durante a conversión. Esta modificación chegou acompañada de varios cambios, todos eles positivos.

Melloras nos animais mediante unha alimentación máis san e a estabulación libre.

Melloras nos prados mediante o emprego de abonos orgánicos como o xurro e o esterco que producen as nosas propias vacas.

Mellora na materia prima alcanzando un leite máis natural, máis san e máis nutritivo.